ریاض: سعودی عرب کے دارالحکومت ریاض میں پاکستان کی معروف سماجی شخصیت، بینکر اور سرپرستِ اعلیٰ تخیل ادبی فورم منصور محبوب چوہدری کی جانب سے ایک پروقار افطار ڈنر کا اہتمام کیا گیا، جس میں سعودی عرب میں مقیم پاکستانی کمیونٹی کی ممتاز شخصیات نے بڑی تعداد میں شرکت کی۔
تقریب میں پاکستانی سفارتخانے کے عہدیداران، سماجی، ادبی اور مذہبی حلقوں سے وابستہ شخصیات کے علاوہ مختلف سیاسی جماعتوں کے نمائندگان، کمیونٹی رہنما اور میڈیا سے وابستہ افراد بھی شریک ہوئے۔ اس موقع پر شرکاء نے باہمی ملاقاتوں کے ذریعے نہ صرف ایک دوسرے سے خیالات کا تبادلہ کیا بلکہ کمیونٹی کے باہمی روابط کو مزید مضبوط بنانے پر بھی گفتگو کی۔
شرکاء نے اس موقع پر منصور محبوب چوہدری کی شخصیت اور خدمات کو خراجِ تحسین پیش کرتے ہوئے کہا کہ وہ نہایت نفیس مزاج، اعلیٰ ادبی ذوق رکھنے والی شخصیت ہیں اور شاعری سے گہرا شغف رکھتے ہیں۔ ان کی شاعری کو پاکستانی کمیونٹی میں خصوصی طور پر سراہا جاتا ہے۔ مقررین کا کہنا تھا کہ منصور محبوب چوہدری ایک باوقار اور خوش اخلاق انسان ہیں جو ادبی سرگرمیوں کے فروغ کے ساتھ ساتھ بینکاری کے شعبے میں بھی نمایاں خدمات انجام دے رہے ہیں۔
تقریب میں مسلم لیگ (ن) کے سینیئر نائب صدر خالد اکرم رانا، سینیئر رہنما مجاہد ندیم رامے، چوہدری خادم بجاڑ، سردار شعیب، رانا سلطان خرم خان، میاں عمیر، میاں عمران ارائیں، میاں ناصر تاج ارائیں، احسن عباسی، حنیف بابر، وسیم ساجد اور زاہد بٹ سمیت متعدد کمیونٹی رہنماؤں نے شرکت کی۔ میڈیا سے رانا عظیم، امتیاز احمد اور جانزیب بھی اس موقع پر موجود تھے۔
شرکاء کا مزید کہنا تھا کہ منصور محبوب چوہدری نے سعودی عرب میں بطور بینکر اپنی پیشہ ورانہ صلاحیتوں اور سماجی خدمات کے ذریعے پاکستانی کمیونٹی میں ایک نمایاں اور قابلِ فخر مقام حاصل کیا ہے۔
تقریب خوشگوار اور دوستانہ ماحول میں اختتام پذیر ہوئی، جہاں شرکاء نے منصور محبوب چوہدری کی شاندار میزبانی کو سراہتے ہوئے امید ظاہر کی کہ مستقبل میں بھی اس نوعیت کی تقریبات کے انعقاد سے کمیونٹی کے باہمی روابط اور اتحاد کو مزید فروغ ملے گا۔
