ریاض-سعودی عرب میں ایلیٹ کنسلٹنگ کمپنی کی جانب سے ماہِ رمضان المبارک کی مناسبت سے ایک پروقار افطار ڈنر اور بزنس نیٹ ورکنگ تقریب کا انعقاد کیا گیا، جس میں پاکستانی کمیونٹی سمیت مختلف ممالک سے تعلق رکھنے والی کاروباری و سماجی شخصیات نے شرکت کی۔
تقریب کے میزبان ایلیٹ کنسلٹنگ کمپنی کے سی ای او عدیل اکرم جسپال اور مینیجنگ ڈائریکٹر ندیم اکرم جسپال تھے، جنہوں نے مہمانوں کا خیرمقدم کیا اور اس موقع کو کمیونٹی اور کاروباری روابط کے فروغ کے لیے اہم قرار دیا۔
تقریب میں پاکستان ایمبیسی سے ڈاکٹر شگفتہ زرین (ٹریڈ منسٹر) اور محترمہ جنت حسین نیکوکرا (ویلفیئر اتاشی) نے خصوصی شرکت کی۔ اس کے علاوہ سعودی، پاکستانی اور دیگر نیشنلٹیز سے تعلق رکھنے والے افراد اور مختلف کمپنیوں کے نمائندے بھی بڑی تعداد میں موجود تھے۔
افطار ڈنر کا مقصد ماہِ رمضان کی برکتوں میں پاکستانی کمیونٹی اور مختلف ممالک کے افراد کو ایک پلیٹ فارم پر اکٹھا کرنا تھا تاکہ باہمی روابط کو مضبوط بنایا جا سکے اور بزنس نیٹ ورکنگ کو فروغ دیا جا سکے۔ اس موقع پر شرکاء کو ایک دوسرے سے ملاقات اور مختلف شعبہ جات میں تعاون کے امکانات پر تبادلہ خیال کا موقع بھی فراہم کیا گیا۔
ایلیٹ کنسلٹنگ کمپنی کے سی ای او عدیل اکرم جسپال نے اپنے خطاب میں کہا کہ ایسی تقریبات کا مقصد سعودی عرب میں موجود مختلف کمپنیوں اور کاروباری شخصیات کے درمیان بہتر روابط قائم کرنا ہے۔ انہوں نے کہا کہ مضبوط نیٹ ورکنگ کے ذریعے کاروباری مواقع میں اضافہ کیا جا سکتا ہے اور پاکستان کا مثبت تشخص بھی اجاگر کیا جا سکتا ہے۔
مینیجنگ ڈائریکٹر ندیم اکرم جسپال نے بھی اس موقع پر کہا کہ کمپنی مستقبل میں بھی اس طرح کی تقریبات کا انعقاد جاری رکھے گی تاکہ کمیونٹی کے افراد کو ایک دوسرے کے قریب لایا جا سکے اور کاروباری تعاون کے نئے راستے کھولے جا سکیں۔
تقریب سے خطاب کرتے ہوئے پاکستان ایمبیسی کی ٹریڈ اینڈ انویسٹمنٹ منسٹر ڈاکٹر شگفتہ زرین نے کہا کہ افطار نیٹ ورکنگ ڈنر ایک بہترین اقدام ہے جو بیرونِ ملک پاکستانی کمیونٹی کو قریب لانے اور کاروباری روابط کو مضبوط بنانے میں اہم کردار ادا کرتا ہے۔
تقریب کے اختتام پر مہمانوں نے ایلیٹ کنسلٹنگ کمپنی کی جانب سے اس بہترین انتظام اور مثبت اقدام کو سراہا اور امید ظاہر کی کہ مستقبل میں بھی اس طرح کی تقریبات کے ذریعے پاکستانی کمیونٹی اور کاروباری روابط کو مزید فروغ ملے گا۔
