ریاض: سعودی عرب کے دارالحکومت ریاض میں معروف کاروباری و سماجی شخصیت صفی اللہ خان کی جانب سے پاکستان سے آئے ہوئے معروف ٹک ٹاکرز ساجد خان اور فواد خان کے اعزاز میں ایک پروقار افطار ڈنر کا اہتمام کیا گیا۔ تقریب میں پاکستانی کمیونٹی کی بڑی تعداد نے شرکت کی اور مہمانوں کا پرتپاک استقبال کیا۔
اس موقع پر خطاب کرتے ہوئے ساجد خان اور فواد خان نے کہا کہ بیرون ملک مقیم پاکستانی نہ صرف اپنی ثقافت اور روایات کو زندہ رکھے ہوئے ہیں بلکہ مختلف پلیٹ فارمز کے ذریعے پاکستان کا مثبت تشخص بھی دنیا کے سامنے پیش کر رہے ہیں۔ ان کا کہنا تھا کہ پاکستان کا روشن چہرہ دنیا بھر میں عزت و احترام کے ساتھ پہچانا جاتا ہے اور اگر جذبہ سچا ہو تو دیارِ غیر میں رہ کر بھی وطن عزیز کا نام بلند کیا جا سکتا ہے۔
میزبان صفی اللہ خان نے اپنے خطاب میں ساجد خان اور فواد خان کو سعودی عرب آمد پر خوش آمدید کہتے ہوئے کہا کہ انہوں نے اپنی محنت اور صلاحیتوں سے پاکستان کا نام روشن کیا ہے۔ ان کا کہنا تھا کہ اصل ہیروز وہ ہوتے ہیں جو اپنے کردار اور عمل سے دنیا کو یہ پیغام دیتے ہیں کہ پاکستانی ایک باوقار، باصلاحیت اور بااخلاق قوم ہیں۔
انہوں نے مزید کہا کہ بیرون ملک بسنے والے پاکستانیوں کو اپنے مثبت کردار اور اچھے اخلاق کے ذریعے اپنے ملک و قوم کی نمائندگی کرنی چاہیے اور بھائی چارے، محبت، اپنائیت اور انسانیت کے فروغ میں کردار ادا کرنا چاہیے، جو اسلام کی اصل تعلیمات ہیں۔
تقریب سے عتیق عارف اور دیگر مقررین نے بھی خطاب کیا اور کمیونٹی کے اتحاد اور باہمی روابط کو مزید مضبوط بنانے کی ضرورت پر زور دیا۔
