ریاض، سعودی عرب :
ای اسپورٹس فاؤنڈیشن (EF) نے 2026 کے لیے کلب پارٹنر پروگرام میں شامل ہونے والے 40 ای اسپورٹس کلبز کا اعلان کر دیا ہے، جس کا مقصد عالمی سطح پر ایک مضبوط اور پائیدار ای اسپورٹس نظام کو فروغ دینا ہے۔
یہ پروگرام اپنی تیسری قسط میں داخل ہو چکا ہے اور 20 ملین ڈالر کی سرمایہ کاری پر مشتمل ہے۔ اس کے تحت ہر منتخب کلب کو ایک ملین ڈالر تک فنڈنگ، اسٹریٹجک رہنمائی اور عالمی سطح پر نمائش کے مواقع فراہم کیے جائیں گے، تاکہ وہ اپنی برانڈ ویلیو اور مداحوں کی تعداد میں اضافہ کر سکیں، خصوصاً ای اسپورٹس ورلڈ کپ 2026 کے دوران۔
گزشتہ تین برسوں میں اس پروگرام اور کلب چیمپئن شپ کے ذریعے 100 ملین ڈالر سے زائد رقم مختلف کلبز میں تقسیم کی جا چکی ہے، جس سے مقابلہ جاتی کارکردگی، مارکیٹنگ اور مداحوں کی شمولیت میں نمایاں بہتری آئی ہے۔
منتخب کلبز کی مجموعی رسائی دنیا بھر میں 300 ملین سے زائد مداحوں تک ہے، جو ای اسپورٹس میں کلبز کے بڑھتے ہوئے اثر و رسوخ کو ظاہر کرتی ہے۔ یہ کلبز شمالی امریکہ، یورپ، مشرق وسطیٰ، چین، کوریا، جنوب مشرقی ایشیا، بھارت اور لاطینی امریکہ سمیت مختلف خطوں سے تعلق رکھتے ہیں۔
ای اسپورٹس فاؤنڈیشن کے ڈائریکٹر ہانس جاگنو کے مطابق یہ پروگرام نہ صرف کلبز کو مضبوط بنانے میں مدد دے رہا ہے بلکہ نئے اور ابھرتے ہوئے مارکیٹس جیسے لاطینی امریکہ، بھارت، ترکی اور جنوب مشرقی ایشیا میں بھی تیزی سے پھیل رہا ہے۔
2026 کے پروگرام میں یورپ سے 9، چین سے 6، شمالی امریکہ سے 5 جبکہ دیگر خطوں سے بھی متعدد کلبز شامل کیے گئے ہیں۔ بھارت کے دو کلبز شامل ہیں جبکہ ترکی پہلی بار اس پروگرام کا حصہ بنا ہے۔
یہ پروگرام کلبز کو ڈیجیٹل مواد، مارکیٹنگ مہمات اور لائیو ایونٹس کے ذریعے اپنے مداحوں سے جڑنے کے مواقع فراہم کرتا ہے۔ 2025 میں شریک کلبز نے 300 ملین سے زائد ویوز حاصل کیے اور 10 ملین سے زیادہ مداحوں کو مختلف سرگرمیوں کے ذریعے متحرک کیا۔
واضح رہے کہ اس پروگرام میں شمولیت کے باوجود کلبز کو ای اسپورٹس ورلڈ کپ 2026 میں شرکت کے لیے باقاعدہ کوالیفائی کرنا ہوگا
