مرکزی جمعیت اہل حدیث الریاض کے زیر اہتمام مولانا عبدالمالک مجاہد کی زیر صدارت ایک اہم اجلاس منعقد ہوا، جس میں حرمین شریفین کی زیارت کے لیے سعودی عرب تشریف لائے مرکزی جمعیت اہل حدیث ضلع گوجرانوالہ کے علمائے کرام کے وفد نے خصوصی شرکت کی۔
وفد میں مولانا حافظ ارشد محمدی، قاری مظہر شہزاد سلفی، مولانا انعام اللہ محمدی، قاری یسین ساجد نقوی، مولانا حافظ امین مغل، طاہر ندیم، انصر محمدی، مولانا اشتیاق احمد، ماسٹر قیصر اور رانا ثاقب شامل تھے۔
اجلاس میں حالیہ دنوں میں پاکستانی اور سعودی قیادت کی دانشمندانہ اور مدبرانہ پالیسیوں کو زبردست خراجِ تحسین پیش کیا گیا۔ مولانا عبدالمالک مجاہد نے اپنے خطاب میں کہا کہ سعودی فرمانروا شاہ سلمان بن عبدالعزیز اور ولی عہد شہزادہ محمد بن سلمان کی بصیرت افروز قیادت نے دنیا کو ممکنہ بڑے بحران سے بچانے میں اہم کردار ادا کیا، جسے تاریخ میں سنہرے حروف سے یاد رکھا جائے گا۔
انہوں نے مزید کہا کہ وزیراعظم پاکستان میاں شہباز شریف، فیلڈ مارشل عاصم منیر اور وزیر خارجہ اسحاق ڈار نے جس ذمہ داری اور بصیرت کا مظاہرہ کیا، اس سے عالمی سطح پر پاکستان کا وقار بلند ہوا اور پوری دنیا میں پاکستانی قوم کو سراہا جا رہا ہے۔
اجلاس میں پاکستان اور سعودی عرب کے درمیان لازوال تعلقات کو اجاگر کرتے ہوئے اس عزم کا اظہار کیا گیا کہ دونوں برادر ممالک کی دوستی ہمیشہ قائم و دائم رہے گی۔ شرکاء نے اس موقع پر “پاک سعودی دوستی زندہ باد” کا نعرہ بھی بلند کیا۔
اس اجلاس میں ڈاکٹر اویس محمود، انجینئر ڈاکٹر حافظ عمران، انجینئر سلمان راشد، چودھری ندیم بگا، شیخ عبدالحسیب، قاری اسد اقبال، حافظ عبدالحی، عبداللہ اقبال، عبدالغفار مجاہد، عبداللہ مجاہد، عبدالکریم بابر، حمزہ عباس اور عمر فاروق کیلانی سمیت کارکنان کی بڑی تعداد نے شرکت کی۔
