ریاض:
سعودی وزارت داخلہ نے بغیر حج پرمٹ حج کرنے والے غیر ملکیوں کے لیے سخت جرمانوں اور سزاؤں کا اعلان کیا ہے۔
وزارت داخلہ کے مطابق وہ تمام غیر ملکی اقامہ ہولڈرز جو غیر قانونی طور پر مکہ مکرمہ میں داخل ہوں، وہاں قیام کریں یا ایام حج کے دوران بغیر پرمٹ کے پکڑے جائیں، ان پر 20 ہزار سے ایک لاکھ سعودی ریال تک جرمانہ عائد کیا جائے گا۔
اس کے علاوہ ایسے افراد کو ملک بدر کر کے دس سال کے لیے سعودی عرب میں داخلے پر پابندی عائد کر دی جائے گی۔
سعودی وزارت داخلہ نے مقامی شہریوں کو بھی خبردار کیا ہے کہ وہ غیر قانونی طور پر سہولت کاری سے گریز کریں، بصورت دیگر ان کے خلاف بھی بھاری جرمانے اور قانونی کارروائی عمل میں لائی جائے گی۔
حکام کے مطابق حجاج کرام کی سیکیورٹی اور امن و سلامتی کو یقینی بنانا اولین ترجیح ہے، جس کے لیے فول پروف انتظامات کیے جا رہے ہیں۔
