جدہ:
وزیراعظم محمد شہباز شریف نے آج شام سعودی عرب کے ولی عہد و وزیر اعظم شہزادہ محمد بن سلمان بن عبدالعزیز السعود سے ملاقات کی۔
نائب وزیراعظم و وزیر خارجہ سینیٹر محمد اسحاق ڈار بھی وزیر اعظم کے ہمراہ تھے۔
تقریباً دو گھنٹے تک جاری رہنے والی ملاقات کے دوران دونوں رہنماؤں نے ابھرتی ہوئی علاقائی صورتحال پر تفصیلی تبادلہ خیال کیا۔ وزیراعظم نے حالیہ علاقائی کشیدگی کے تناظر میں مملکت سعودی عرب کے لیے مکمل یکجہتی اور حمایت کا اظہار کیا۔ انہوں نے قیمتی جانوں کے ضیاع پر گہرے دکھ کا اظہار کیا اور کہا کہ پاکستانی عوام اپنے سعودی بھائیوں کے ساتھ شانہ بشانہ کھڑے ہیں۔
وزیراعظم نے سعودی ولی عہد کی قیادت میں مثالی صبر اور تحمل کو سراہا اور کہا کہ موجودہ بحران میں ان کی قیادت سعودی عرب سمیت دنیا بھر کے امن پسند افراد کے لیے باعثِ تقویت ہے۔
وزیراعظم نے سعودی ولی عہد کو پاکستان کی امن کوششوں سے متعلق حالیہ پیش رفت سے آگاہ کیا، جس کے نتیجے میں امریکہ اور ایران کے درمیان جنگ بندی ہوئی اور حال ہی میں اسلام آباد میں دونوں ممالک کے درمیان تاریخی مذاکرات کا انعقاد ہوا۔ ولی عہد نے اس عمل میں وزیراعظم شہباز شریف اور فیلڈ مارشل سید عاصم منیر کے تعمیری کردار کو سراہا۔
دوطرفہ امور پر تبادلہ خیال کرتے ہوئے وزیراعظم نے پاکستان کے معاشی استحکام کے لیے سعودی عرب کی مسلسل حمایت پر شکریہ ادا کیا۔ انہوں نے کہا کہ پاکستان اور سعودی عرب کے درمیان تعلقات منفرد نوعیت کے ہیں اور دونوں ممالک اسٹریٹجک دفاعی شراکت دار ہیں۔
دونوں رہنماؤں نے باہمی دلچسپی کے امور پر قریبی تعاون جاری رکھنے کے عزم کا اعادہ کیا۔
