ریاض: سعودی عرب کے وزیر ثقافت شہزادہ بدر بن عبداللہ بن فرحان آل سعود کی سرپرستی میں غیر منافع بخش ثقافتی شعبے کے پہلے فورم کا آغاز ریاض کے کنگ فہد کلچرل سینٹر میں ہوا۔
افتتاحی اجلاس میں “ثقافت بطور سافٹ پاور: مستقبل کی تشکیل میں غیر منافع بخش شعبے کے کردار کی نئی تعریف” کے عنوان سے گفتگو کرتے ہوئے شہزادہ ترکی الفیصل (چیئرمین کنگ فیصل سنٹر برائے تحقیق و اسلامی مطالعات) نے کہا کہ سعودی عرب کی ثقافت اسلامی اصولوں، اخلاقی اقدار اور انسانیت کے احترام پر مبنی ہے اور جزیرہ عرب کے ورثے پر فخر کرتی ہے۔
انہوں نے وزارتِ ثقافت کی کاوشوں کو سراہتے ہوئے کہا کہ وزارت نے غیر منافع بخش ثقافتی اداروں کی کامیابی کے لیے ضروری وسائل اور سہولیات فراہم کی ہیں۔ انہوں نے اس بات پر زور دیا کہ سعودی شہری اپنی ثقافت کے سفیر ہیں اور انہیں اپنی اسلامی و قومی اقدار کے ذریعے اسے دنیا کے سامنے پیش کرنا چاہیے۔
شہزادہ ترکی الفیصل نے تعلیمی پروگراموں کے ذریعے قومی ثقافت کے فروغ میں مملکت کے کردار کو بھی سراہا، جس سے معاشرہ سوشل میڈیا کے دور میں منفی اثرات کا مقابلہ کرنے کے قابل ہوا ہے۔
دو روزہ فورم کا مقصد غیر منافع بخش ثقافتی شعبے، اس کے مستقبل کے کردار اور دستیاب مواقع کو اجاگر کرنا ہے۔ یہ شعبہ وزارت ثقافت کی حکمت عملی کے بعد نمایاں ترقی کر رہا ہے، جس میں پیشہ ورانہ انجمنوں کا قیام، اداروں کی تنظیم نو، اور کارکردگی کی بنیاد پر مالی معاونت جیسے اقدامات شامل ہیں۔
