ریاض: اسلامی دنیا کی سب سے بڑی اور باوقار ایوارڈ تقریبات میں شمار ہونے والی کنگ فیصل پرائز کی تقریب شاہ سلمان بن عبدالعزیز کی خصوصی سرپرستی میں منعقد ہوئی۔
تقریب میں دنیا بھر سے ممتاز شخصیات، اسکالرز اور سائنسدانوں نے شرکت کی، جبکہ اعلیٰ حکومتی شخصیات، سفارتی نمائندوں، دانشوروں اور علمی و تحقیقی حلقوں سے تعلق رکھنے والے افراد کی بڑی تعداد بھی موجود تھی، جس نے اس ایونٹ کو ایک عالمی سطح کا علمی اجتماع بنا دیا۔
اس سال خدمتِ اسلام کے شعبے میں عبداللطيف بن أحمد الفوزان اور محمد محمد أبو موسى کو ایوارڈ دیا گیا۔ اسلامیات میں عبدالحميد حسين محمود حمودة اور محمد وهيب حسين کامیاب قرار پائے، جبکہ عربی زبان و ادب میں بيير لارشيه کو اعزاز سے نوازا گیا۔
طب کے شعبے میں سفيتلانا مويسوف اور سائنس (ریاضی) میں كارلوس كينغ کو بھی اس نمایاں اعزاز سے نوازا گیا۔
کنگ فیصل پرائز کا آغاز 1977 میں ہوا جبکہ پہلی بار یہ ایوارڈ 1979 میں دیا گیا۔ ابتدا میں یہ تین شعبوں تک محدود تھا، تاہم بعد ازاں طب اور سائنس کو بھی شامل کر لیا گیا، جس کے بعد یہ عالمی سطح پر ایک معتبر علمی و تحقیقی اعزاز بن گیا۔
یہ ایوارڈ بین الاقوامی سطح پر بے حد قدر کی نگاہ سے دیکھا جاتا ہے اور اسے سائنسی، ادبی اور اسلامی خدمات کے اعتراف میں ایک نمایاں عالمی اعزاز سمجھا جاتا ہے۔ 2026 کی تقریب میں بھی دنیا بھر کے ماہرین کی خدمات کو سراہتے ہوئے علم و تحقیق کے فروغ کے عزم کا اعادہ کیا گیا۔
