ریاض :
پاکستان کی جانب سے ایران اور امریکہ کے درمیان کشیدگی کم کرنے اور جنگ بندی کے لیے کی جانے والی سفارتی کوششوں کو سراہتے ہوئے سعودی دارالحکومت ریاض میں ایک خصوصی تقریب کا انعقاد کیا گیا، جس میں وزیراعظم شہباز شریف اور آرمی چیف فیلڈ مارشل سید عاصم منیر کو خراج تحسین پیش کیا گیا۔
یہ تقریب پاکستانی کمیونٹی کے زیر اہتمام منعقد ہوئی، جس میں مختلف شعبہ ہائے زندگی سے تعلق رکھنے والی نمایاں شخصیات نے شرکت کی۔ مہمانانِ خصوصی میں جدہ سے تشریف لانے والے سابق مشیر برائے وزیراعلیٰ پنجاب چوہدری اظہر عباس وڑائچ اور چیئرمین پاک میڈیا جرنلسٹ فورم انٹرنیشنل چوہدری نورالحسن گجر شامل تھے۔
تقریب کے میزبان سینیئر لیگی رہنما چوہدری خادم حسین بجاڑ نے مہمانوں اور شرکاء کا خیرمقدم کرتے ہوئے ان کی کمیونٹی خدمات کو سراہا۔ انہوں نے ایران امریکہ کشیدگی کم کرنے کے حوالے سے حکومت پاکستان کی سفارتی کاوشوں کو قابلِ تحسین قرار دیتے ہوئے کہا کہ ان اقدامات سے عالمی سطح پر پاکستان کا مثبت تشخص اجاگر ہوا ہے۔
اس موقع پر سینیئر لیگی رہنما خالد اکرم رانا، چوہدری عبدالمجید گجر، چوہدری ناصر محمود آرائیں، سینیئر صحافی عثمان منظور، اینکر پرسن حافظ عرفان کھٹانہ اور دیگر مقررین نے بھی خطاب کیا اور حکومت کی خارجہ پالیسیوں کو سراہا۔
مہمانانِ خصوصی چوہدری اظہر عباس وڑائچ اور چوہدری نورالحسن گجر نے اپنے خطاب میں کہا کہ ریاض میں ملنے والی محبت قابلِ فخر ہے اور اوورسیز پاکستانیوں کے درمیان اتحاد وقت کی اہم ضرورت ہے۔ انہوں نے کہا کہ پاک سعودی تعلقات مزید مستحکم ہو رہے ہیں۔
انہوں نے مزید کہا کہ فیلڈ مارشل سید عاصم منیر کے کردار نے عالمی سطح پر پاکستان کا وقار بلند کیا ہے، جبکہ ان کی پالیسیوں کے باعث اوورسیز پاکستانیوں کی عزت میں اضافہ ہوا ہے اور پاکستانی پاسپورٹ کے وقار میں بھی بہتری آئی ہے۔
تقریب کے اختتام پر شرکاء نے ان سفارتی کوششوں کو پاکستان کی دانشمندانہ خارجہ پالیسی کا مظہر قرار دیتے ہوئے حکومت کی کاوشوں کو سراہا۔
