سعودی عرب کے دارالحکومت ریاض میں ریاض فنانس لیڈرز حب کے زیر اہتمام امریکہ سے آئے ہوئے ڈاکٹر انسب خالد کے اعزاز میں ایک پروقار تقریب کا انعقاد کیا گیا۔ تقریب کی میزبانی نعیم قریشی اور زبیر خان بلوچ نے کی، جس میں سعودی عرب میں مقیم پاکستانی فنانس کمیونٹی کی نمایاں شخصیات نے شرکت کی۔
ڈاکٹر انسب خالد نے اپنے خطاب میں کہا کہ فنانس بظاہر ایک خشک شعبہ ہے، تاہم اس میں کامیابی کے لیے ذہنی صحت کا بہتر ہونا نہایت ضروری ہے۔ انہوں نے زور دیا کہ بہت سے افراد ذہنی مسائل کا شکار ہوتے ہیں مگر اس کا اظہار نہیں کرتے، اس لیے ضروری ہے کہ انسان اپنی زندگی میں توازن برقرار رکھے اور اپنی صحت کا خصوصی خیال رکھے۔
ضیاء مصطفیٰ نے کہا کہ ذہنی صحت کے لیے پیشہ ورانہ اور ذاتی زندگی میں توازن ناگزیر ہے۔ ڈاکٹر محمد عظیم اور محمد دانش کا کہنا تھا کہ بہت سے افراد ذہنی دباؤ کا شکار ہوتے ہیں لیکن اکثر انہیں خود بھی اس کا ادراک نہیں ہوتا۔
طاہر مقبول نے کہا کہ اینزائٹی کو عام سی کیفیت سمجھ لیا جاتا ہے، حالانکہ اس پر خصوصی توجہ دینا ضروری ہے۔ عمار الحسن کے مطابق ہر کمپنی کو اپنے عملے کی ذہنی صحت کا خیال رکھنا چاہیے، جبکہ عظیم شیخ اور شکیل احمد نے اس بات پر زور دیا کہ ہمیں اپنے لیے وقت نکالنا چاہیے۔
دیگر مقررین میں مدثر فاروق، مبشر خان، ابو بکر اور فصیح الدین شامل تھے، جنہوں نے ذہنی صحت پر خصوصی توجہ دینے کی اہمیت پر زور دیا۔
تقریب میں شرکت کرنے والی معزز شخصیات میں ضیاء مصطفیٰ، محمد دانش، ڈاکٹر محمد عظیم، مدثر فاروق، محمد نعمان، عمار الحسن، زبیر خان بلوچ، عظیم شیخ، شکیل احمد، اجمل نیاز، طاہر مقبول، نعیم قریشی، مبشر خان، ابو بکر اور فصیح الدین شامل تھے۔
آخر میں نعیم قریشی اور زبیر خان بلوچ نے تمام مہمانوں کا شکریہ ادا کیا اور آئندہ بھی ایسے معلوماتی پروگرامز کے انعقاد کے عزم کا اظہار کیا۔
