جدہ: پاکستان انویسٹرز فورم کے زیر اہتمام قونصل جنرل پاکستان، سید مصطفیٰ ربانی کے اعزاز میں ایک پروقار استقبالیہ اور عشائیہ کا انعقاد کیا گیا، جس میں سعودی عرب میں مقیم ممتاز کاروباری شخصیات، سرمایہ کاروں، مختلف تنظیموں کے نمائندوں اور پاکستانی کمیونٹی کی بڑی تعداد نے شرکت کی۔
تقریب سے خطاب کرتے ہوئے قونصل جنرل پاکستان سید مصطفیٰ ربانی نے کہا کہ بیرونِ ملک مقیم پاکستانی سرمایہ کار منظم، مؤثر اور پائیدار سرمایہ کاری کے ذریعے پاکستان کی معیشت کو مزید مضبوط بنانے میں اہم کردار ادا کر سکتے ہیں۔ انہوں نے کہا کہ جدہ میں پاکستانی قونصل خانہ سرمایہ کاروں کو ہر ممکن تعاون، رہنمائی اور سہولت فراہم کرنے کے لیے اپنی ذمہ داریاں پوری کرتا رہے گا۔
اس موقع پر چوہدری شفقت محمود دھول کو پاکستان انویسٹرز فورم سعودی عرب کا چیئرمین مقرر کرنے کا اعلان کیا گیا۔ تقریب میں بتایا گیا کہ ان کے ساتھ چار رکنی ٹیم بھی خدمات انجام دے گی، جو سعودی عرب میں مقیم پاکستانی تاجروں اور سرمایہ کاروں کی رہنمائی، نئے کاروباری مواقع کی نشاندہی اور پاکستان میں سرمایہ کاری کے فروغ کے لیے فعال کردار ادا کرے گی۔
نومنتخب چیئرمین چوہدری شفقت محمود دھول نے اپنے خطاب میں کہا کہ مختلف کاروباری اور سرمایہ کاری فورمز کو ایک مؤثر پلیٹ فارم پر متحد کر کے سرمایہ کاروں کے درمیان روابط کو مضبوط بنایا جا رہا ہے تاکہ پاکستان اور سعودی عرب کے درمیان تجارت، سرمایہ کاری اور اقتصادی تعاون کو نئی جہت دی جا سکے۔
پاکستان انویسٹرز فورم کے سیکریٹری جنرل عبدالخالق لک نے کہا کہ کمیونٹی کے مسائل کے حل، سرمایہ کاری کے فروغ اور نوجوانوں کے لیے نئے معاشی مواقع پیدا کرنے کے لیے اجتماعی کوششیں وقت کی اہم ضرورت ہیں۔
فورم کے صدر غلام صفدر نے کہا کہ پاکستان انویسٹرز فورم کو مزید منظم، فعال اور مؤثر بنانے کے لیے مشترکہ حکمت عملی پر کام جاری ہے تاکہ سرمایہ کاروں کو ایک مضبوط اور قابلِ اعتماد پلیٹ فارم فراہم کیا جا سکے۔
اس موقع پر پاکستان ایگزیکٹو فورم کے چیئرمین منیر احمد شاد نے کہا کہ مختلف فورمز کا اتحاد پاکستانی سرمایہ کاروں کے لیے ایک مثبت پیش رفت ہے، جس کے نتیجے میں مستقبل میں دونوں برادر ممالک کے درمیان اقتصادی تعاون اور سرمایہ کاری کے نئے مواقع پیدا ہوں گے۔
تقریب کے اختتام پر قونصل جنرل پاکستان سید مصطفیٰ ربانی، چیئرمین پاکستان ایگزیکٹو فورم منیر احمد شاد اور صدر پاکستان انویسٹرز فورم غلام صفدر کو ان کی خدمات کے اعتراف میں یادگاری شیلڈز پیش کی گئیں، جبکہ شرکاء کے اعزاز میں عشائیے کا بھی اہتمام کیا گیا۔
