ریاض: پاکستان پیپلز پارٹی مڈل ایسٹ کے نائب صدر مشتاق بلوچ کی جانب سے پاکستان پیپلز پارٹی مڈل ایسٹ کے صدر میاں منیر ہانس کے اعزاز میں ایک پرتکلف عشائیے کا اہتمام کیا گیا، جس میں پارٹی عہدیداران، کارکنان اور سعودی عرب میں مقیم پاکستانی کمیونٹی کی ممتاز شخصیات نے بھرپور شرکت کی۔
اس موقع پر اپنے خطاب میں میاں منیر ہانس نے کہا کہ پاکستان پیپلز پارٹی ہمیشہ جمہوریت، عوامی خدمت اور کارکنوں کے حقوق کے لیے جدوجہد کرتی رہی ہے۔ انہوں نے کہا کہ بیرونِ ملک مقیم پاکستانی پارٹی کا قیمتی سرمایہ ہیں اور پاکستان کی ترقی اور خوشحالی میں ان کا کردار نہایت اہم ہے۔
میزبان مشتاق بلوچ نے تمام مہمانوں کا خیرمقدم کرتے ہوئے کہا کہ اس تقریب کا مقصد پارٹی کارکنوں کو ایک پلیٹ فارم پر اکٹھا کرنا، باہمی روابط کو فروغ دینا اور تنظیم کو مزید مضبوط اور فعال بنانا ہے۔
تقریب سے قاضی اسحاق میمن، قریب اللہ اور دیگر مقررین نے بھی خطاب کیا۔ انہوں نے پاکستان پیپلز پارٹی کی قیادت پر بھرپور اعتماد کا اظہار کرتے ہوئے کہا کہ پارٹی ہمیشہ عوام کی آواز بنی ہے، جبکہ اوورسیز کارکن تنظیم کو مزید مضبوط، فعال اور منظم بنانے کے لیے اپنا کردار ادا کرتے رہیں گے۔
تقریب خوشگوار ماحول میں اختتام پذیر ہوئی، جہاں شرکاء نے باہمی اتحاد، تنظیمی یکجہتی اور پاکستان پیپلز پارٹی کے نظریے کو مزید فروغ دینے کے عزم کا اعادہ کیا۔
