ریاض (رانا عظیم) پاکستان پیپلز پارٹی گلف کے زیرِ اہتمام ریاض میں منعقدہ ایک اہم اجلاس میں نوجوان اور متحرک رہنما عبدالقادر خان کو ریسرچ اینڈ کوآرڈینیشن سیل (RCC) سعودی عرب کا انچارج مقرر کر دیا گیا۔ اجلاس میں پاکستان سے آئے ہوئے پیپلز پارٹی کے سینئر رہنما چودھری سجاد نذیر نے خصوصی شرکت کی۔
اجلاس کی میزبانی پیپلز پارٹی گلف کلچرل ونگ کے صدر قاضی اسحاق میمن نے کی۔ اس موقع پر عبدالقادر خان کو RCC کے سربراہ سینیٹر ندیم احمد بھٹو کی جانب سے جاری کردہ تقرری کی سند پیش کی گئی۔ شرکائے اجلاس نے اس تقرری کا خیرمقدم کرتے ہوئے اسے پارٹی کی تنظیمی سرگرمیوں کے فروغ کے لیے ایک اہم پیش رفت قرار دیا۔
اجلاس سے خطاب کرتے ہوئے چودھری سجاد نذیر، قاضی اسحاق میمن، ملک فقیر حسین اور حنیف بابر نے کہا کہ سعودی عرب میں ریسرچ اینڈ کوآرڈینیشن سیل کا قیام پارٹی کے تنظیمی ڈھانچے کو مزید مؤثر بنانے کی جانب ایک اہم قدم ہے۔ ان کے مطابق اس اقدام سے پارٹی کی کارکردگی بہتر بنانے، کارکنوں کے درمیان رابطوں کو مضبوط کرنے اور بیرونِ ملک مقیم پاکستانیوں کے مسائل کی نشاندہی اور ان کے حل کے لیے مؤثر کردار ادا کرنے میں مدد ملے گی۔
پاکستان پیپلز پارٹی کے سینئر رہنما اور RCC گلف کے انچارج چودھری سجاد نذیر نے اپنے خطاب میں کہا کہ پاکستان پیپلز پارٹی ملک کی ایک بڑی سیاسی جماعت ہے، جو شہید ذوالفقار علی بھٹو اور محترمہ بے نظیر بھٹو کے وژن کے مطابق عوامی خدمت، جمہوریت اور عوامی حقوق کی ترجمانی کے مشن پر کاربند ہے۔ انہوں نے کہا کہ پارٹی بیرونِ ملک مقیم پاکستانیوں کے مسائل کو اجاگر کرنے اور ان کے حل کے لیے اپنا کردار ادا کرتی رہے گی۔
اجلاس کے دوران سانحہ کارساز کے شہداء اور پارٹی کے سینئر رہنماؤں ریاض راٹھور اور عبدالرحمن گجر کے ایصالِ ثواب کے لیے دعائے مغفرت بھی کی گئی۔
تقریب میں پاکستان پیپلز پارٹی کے کارکنوں اور عہدیداروں کے علاوہ مختلف سماجی، سیاسی اور صحافتی تنظیموں کے نمائندوں نے شرکت کی۔ شرکاء نے امید ظاہر کی کہ عبدالقادر خان اپنی نئی ذمہ داریاں نبھاتے ہوئے سعودی عرب میں پارٹی کی تنظیمی سرگرمیوں اور بیرونِ ملک مقیم پاکستانیوں کی نمائندگی کو مزید مؤثر بنانے میں کردار ادا کریں گے۔
