ریاض;- پاکستان کے وفاقی وزیرِ خزانہ سینیٹر محمد اورنگزیب نے ریاض میں مملکتِ سعودی عرب کے وزیرِ خزانہ عزت مآب محمد بن عبداللہ الجدعان سے اہم ملاقات کی۔ اس موقع پر پاکستان کے وفاقی وزیر برائے توانائی (پاور ڈویژن) سردار اویس احمد خان لغاری بھی موجود تھے۔ یہ ملاقات پاکستان۔سعودی دوطرفہ فنانس گروپ کے اجلاس کے موقع پر منعقد ہوئی۔
ملاقات کے دوران وفاقی وزیرِ خزانہ سینیٹر محمد اورنگزیب نے پاکستان کی جانب سے سعودی قیادت کا شکریہ ادا کرتے ہوئے کہا کہ مملکتِ سعودی عرب نے ہمیشہ پاکستان کی معاشی ترقی اور استحکام میں قابلِ قدر تعاون اور مسلسل حمایت فراہم کی ہے، جو دونوں برادر ممالک کے درمیان مضبوط اور دیرینہ تعلقات کا مظہر ہے۔
دونوں وزرائے خزانہ نے پاکستان اور سعودی عرب کے درمیان دوطرفہ تعلقات کو مزید مستحکم بنانے کے عزم کا اعادہ کیا اور مالیاتی، سرمایہ کاری، توانائی اور بجلی کے شعبوں میں تعاون کے فروغ کے لیے نئے مواقع پر تفصیلی تبادلۂ خیال کیا۔
اس موقع پر وفاقی وزیر برائے توانائی سردار اویس احمد خان لغاری نے توانائی کے شعبے میں مشترکہ سرمایہ کاری، جدید منصوبوں اور مستقبل میں تعاون کے امکانات پر اپنے خیالات کا اظہار کرتے ہوئے اس شعبے میں شراکت داری کو مزید وسعت دینے کی ضرورت پر زور دیا۔
ملاقات میں اس بات پر اتفاق کیا گیا کہ دونوں ممالک کے درمیان اقتصادی، مالیاتی اور توانائی کے شعبوں میں باہمی تعاون کو مزید فروغ دیا جائے گا تاکہ سرمایہ کاری، مشترکہ ترقی اور پائیدار معاشی استحکام کے نئے مواقع پیدا کیے جا سکیں۔
یہ ملاقات پاکستان اور مملکتِ سعودی عرب کے درمیان مضبوط ہوتے ہوئے اقتصادی اور تزویراتی تعلقات کی عکاسی کرتی ہے اور مختلف شعبوں میں دوطرفہ تعاون کو مزید وسعت دینے کے مشترکہ عزم کا اظہار ہے۔
