ریاض: پاکستان کے وفاقی وزیرِ توانائی (پاور ڈویژن) سردار اویس احمد خان لغاری نے آج ریاض میں سعودی حکام کے ساتھ انرجی گروپ کے اعلیٰ سطحی اجلاس کی مشترکہ صدارت کی، جس میں دونوں ممالک کے درمیان توانائی کے شعبے میں جاری تعاون کا تفصیلی جائزہ لیا گیا۔
اجلاس کے دوران پاکستان اور سعودی عرب کے درمیان جاری مشترکہ منصوبوں پر ہونے والی پیش رفت پر اطمینان کا اظہار کیا گیا اور توانائی کے شعبے میں باہمی تعاون کو مزید وسعت دینے کے عزم کا اعادہ کیا گیا۔
فریقین نے مستقبل کے اسٹریٹجک منصوبوں، سرمایہ کاری کے مواقع اور توانائی کے مختلف شعبوں میں شراکت داری کو فروغ دینے سے متعلق امور پر بھی تفصیلی تبادلۂ خیال کیا۔ اجلاس میں اس امر پر اتفاق کیا گیا کہ دونوں برادر ممالک کے درمیان توانائی کے شعبے میں تعاون کو مزید مؤثر اور نتیجہ خیز بنانے کے لیے قریبی رابطے برقرار رکھے جائیں گے۔
اجلاس میں دونوں جانب سے جاری منصوبوں پر ہونے والی پیش رفت کو حوصلہ افزا قرار دیا گیا اور اس اعتماد کا اظہار کیا گیا کہ مستقبل میں مشترکہ کاوشوں کے ذریعے پاکستان اور سعودی عرب کے درمیان توانائی کے شعبے میں اسٹریٹجک تعاون مزید مضبوط ہوگا
