ریاض: سعودی عرب کے دارالحکومت ریاض میں معروف پاکستانی کاروباری شخصیت اور پاکستان مسلم لیگ (ن) سعودی عرب کے نائب صدر زاہد سندھو کی جانب سے پاکستان سے تشریف لانے والے پاکستان مسلم لیگ (ن) کے اوورسیز کوآرڈینیٹر مرزا الطاف کے اعزاز میں ایک پروقار استقبالیہ تقریب کا انعقاد کیا گیا، جس میں پاکستانی کاروباری شخصیات، کمیونٹی رہنماؤں، سماجی شخصیات اور پاکستان مسلم لیگ (ن) سعودی عرب کے عہدیداران نے بڑی تعداد میں شرکت کی۔
تقریب کے دوران پاکستان اور سعودی عرب کے درمیان دیرینہ برادرانہ تعلقات، دوطرفہ تجارت، سرمایہ کاری کے فروغ اور اوورسیز پاکستانیوں کے کردار پر تفصیلی تبادلۂ خیال کیا گیا۔ مقررین نے اس بات پر زور دیا کہ بیرونِ ملک مقیم پاکستانی دونوں برادر ممالک کے درمیان معاشی تعاون کو مزید وسعت دینے اور پاکستان میں سرمایہ کاری کے نئے مواقع پیدا کرنے میں اہم کردار ادا کر سکتے ہیں۔
اپنے خطاب میں مرزا الطاف نے اوورسیز پاکستانیوں کی خدمات کو خراجِ تحسین پیش کرتے ہوئے کہا کہ بیرونِ ملک مقیم پاکستانی نہ صرف وطن کی معیشت میں اہم کردار ادا کر رہے ہیں بلکہ دنیا بھر میں پاکستان کا مثبت تشخص بھی اجاگر کر رہے ہیں۔ انہوں نے کہا کہ اوورسیز پاکستانیوں اور کاروباری برادری کے ساتھ مضبوط روابط قائم رکھنا حکومت کی اہم ترجیحات میں شامل ہے۔
تقریب سے پاکستان مسلم لیگ (ن) سعودی عرب کے سینئر نائب صدر خالد اکرام رانا، رانا اشرف، میاں عمران، ارشد محمود بھٹی، راجہ سجاد، حافظ خالد طاہر، چوہدری خادم بجاڑ اور ضرار بلوچ نے بھی خطاب کیا۔ مقررین نے پاکستان اور سعودی عرب کے تاریخی برادرانہ تعلقات، تجارت و سرمایہ کاری کے فروغ، اوورسیز پاکستانیوں کے مسائل کے حل اور کمیونٹی کے اتحاد و اتفاق کی اہمیت پر روشنی ڈالی۔
تقریب کے اختتام پر میزبان زاہد سندھو نے تمام معزز مہمانوں کی شرکت پر شکریہ ادا کرتے ہوئے اس عزم کا اظہار کیا کہ مستقبل میں بھی ایسی تقریبات کے ذریعے پاکستانی کمیونٹی، کاروباری حلقوں اور پاکستان و سعودی عرب کے درمیان دوطرفہ تعاون، سرمایہ کاری اور برادرانہ تعلقات کو مزید مضبوط بنانے کی کوششیں جاری رکھی جائیں گی۔
