پشاور: پاکستان کے معروف ٹک ٹاکر، اداکار اور سوشل میڈیا انفلوئنسر ساجد خان، جو "پبی کنگ” کے نام سے شہرت رکھتے ہیں، اپنی منفرد اداکاری، تخلیقی ویڈیوز اور مسلسل محنت کے باعث پاکستان کے مقبول ترین ڈیجیٹل کریئیٹرز میں شمار کیے جاتے ہیں۔
یکم ستمبر 2004 کو پبی، نوشہرہ میں پیدا ہونے والے ساجد خان نے 2023 میں سینا پبلک اسکول سے میٹرک مکمل کیا۔ انہوں نے نوجوانی ہی میں سوشل میڈیا کی دنیا میں قدم رکھا اور اپنی اداکاری پر مبنی ویڈیوز کے ذریعے لاکھوں دل جیت لیے۔ آج "پبی کنگ” کا نام پاکستان کے کامیاب ترین نوجوان سوشل میڈیا اسٹارز میں لیا جاتا ہے۔
ساجد خان کے سوشل میڈیا پلیٹ فارمز پر مداحوں کی تعداد قابلِ رشک ہے۔ ان کے ٹک ٹاک پر 6.6 ملین، فیس بک پر 10 لاکھ سے زائد جبکہ انسٹاگرام پر 165 ہزار سے زیادہ فالوورز موجود ہیں، جو کسی بھی ڈیجیٹل کریئیٹر کے لیے ایک بڑی کامیابی تصور کی جاتی ہے۔
"پبی کنگ” کا لقب انہیں ان کے آبائی شہر پبی کی نسبت سے مداحوں نے دیا، جو وقت کے ساتھ ان کی منفرد شناخت اور مضبوط برانڈ بن گیا۔
ساجد خان متعدد ممالک کا دورہ بھی کر چکے ہیں اور مسلسل ایسا معیاری اور دلچسپ مواد تخلیق کر رہے ہیں جسے لاکھوں لوگ پسند کرتے ہیں۔ ان کا کہنا ہے کہ مستقبل میں وہ ایک کامیاب اداکار اور کاروباری شخصیت بننے کا خواب رکھتے ہیں۔
نوجوانوں کے نام اپنے پیغام میں ساجد خان نے کہا:
"کسی بھی کام کو ادھورا نہ چھوڑیں اور محنت سے کبھی پیچھے نہ ہٹیں۔ اگر آپ پوری لگن اور ایمانداری کے ساتھ کام کریں گے تو کامیابی ایک دن ضرور آپ کے قدم چومے گی۔”
اپنی محنت، مستقل مزاجی اور تخلیقی صلاحیتوں کے باعث پبی کنگ آج پاکستان کے نوجوانوں کے لیے ایک متاثر کن مثال بن چکے ہیں۔
