ریاض : پاکستان پیپلز پارٹی گلف و سعودی عرب کے سینئر رہنما، بزمِ ریاض کے چیئرمین اور ممتاز اوورسیز پاکستانی محمد ریاض راٹھور کے انتقال پر پیپلز پارٹی ریاض ریجن کے زیرِ اہتمام تعزیتی اجلاس اور دعائے مغفرت کا انعقاد کیا گیا۔
اجلاس میں پیپلز پارٹی گلف و سعودی عرب کے عہدیداران و کارکنان، مختلف سیاسی، سماجی، مذہبی، ثقافتی، ادبی اور صحافتی تنظیموں کے نمائندوں اور پاکستانی کمیونٹی کی سرکردہ شخصیات نے شرکت کی۔ بزمِ ریاض کے ذمہ داران نے پاکستان اور سعودی عرب سے آن لائن شرکت کرتے ہوئے مرحوم کی خدمات کو خراجِ تحسین پیش کیا۔
پاکستان مسلم لیگ (ن)، جے یو آئی (ف)، مجلسِ پاکستان، جمہوری وطن پارٹی، اے این پی، بزمِ ریاض اور دیگر سیاسی و سماجی تنظیموں کے نمائندوں نے پیپلز پارٹی اور مرحوم کے اہلِ خانہ سے تعزیت کا اظہار کیا۔ مقررین نے محمد ریاض راٹھور کی سیاسی، سماجی، ادبی اور ثقافتی خدمات کو سراہتے ہوئے انہیں پاکستانی کمیونٹی کے لیے ایک فعال اور مخلص شخصیت قرار دیا۔
پیپلز پارٹی گلف کے سیکرٹری جنرل محمد خالد رانا، صدر ثقافتی ونگ گلف قاضی اسحاق میمن، صدر ریاض ریجن احسن عباسی، سینئر نائب صدر وسیم ساجد اور سینئر رہنما سردار عبدالرزاق سمیت دیگر رہنماؤں نے کہا کہ محمد ریاض راٹھور پارٹی کے نظریاتی وابستگان میں نمایاں مقام رکھتے تھے اور ذوالفقار علی بھٹو اور بے نظیر بھٹو کے سیاسی فلسفے، جمہوریت، عوامی حقوق اور سماجی انصاف کے لیے اپنا کردار ادا کرتے رہے۔
بزمِ ریاض کے نمائندوں نے مرحوم کی سماجی و ثقافتی خدمات کو خراجِ تحسین پیش کرتے ہوئے کہا کہ انہوں نے سعودی عرب میں متعدد محافل اور تقریبات کے ذریعے پاکستانی ثقافت اور پاکستان کے مثبت تشخص کے فروغ میں کردار ادا کیا۔
اجلاس کے اختتام پر معروف مذہبی اسکالر قاری عزیز الرحمٰن درانی نے مرحوم کے لیے اجتماعی دعائے مغفرت کرائی۔ شرکاء نے اہلِ خانہ سے دلی تعزیت کا اظہار کرتے ہوئے مرحوم کے لیے درجاتِ بلندی اور پسماندگان کے لیے صبرِ جمیل کی دعا کی۔
