ریاض: اوورسیز پاکستانی فاؤنڈیشن (OPF) کے بورڈ آف گورنرز کے چیئرمین سید قمر رضا شاہ معروف پاکستانی کاروباری و سماجی شخصیات چوہدری محمد افضل بشیر چیمہ اور توصیف الرحمٰن گورایہ کی خصوصی دعوت پر 12 اکتوبر کو سعودی عرب پہنچیں گے۔
ذرائع کے مطابق سید قمر رضا شاہ کی 12 اکتوبر کو ریاض آمد پر چوہدری محمد افضل بشیر چیمہ، توصیف الرحمٰن گورایہ اور پاکستانی کمیونٹی کے دیگر نمائندوں کی جانب سے ان کا پرتپاک استقبال کیا جائے گا۔ اس موقع پر پاکستانی کمیونٹی کی اہم شخصیات اور نمائندوں کی بڑی تعداد بھی موجود ہوگی۔
سید قمر رضا شاہ اپنے دورۂ سعودی عرب کے دوران مملکت میں مقیم پاکستانی کمیونٹی کے مختلف نمائندوں، کاروباری و سماجی شخصیات اور کمیونٹی رہنماؤں سے ملاقاتیں کریں گے۔ ان ملاقاتوں میں اوورسیز پاکستانیوں کو درپیش مسائل، مشکلات، فلاح و بہبود اور ان کے ممکنہ حل سمیت مختلف امور پر تبادلۂ خیال کیا جائے گا۔
ذرائع کے مطابق ریاض میں مصروفیات کے بعد سید قمر رضا شاہ جدہ، دمام اور مدینہ منورہ بھی جائیں گے، جہاں وہ پاکستانی کمیونٹی کی اہم شخصیات اور نمائندوں سے ملاقاتیں کریں گے۔ ان ملاقاتوں میں کمیونٹی کے مسائل اور اوورسیز پاکستانیوں سے متعلق مختلف امور پر بھی گفتگو متوقع ہے۔
دورۂ سعودی عرب کے دوران سید قمر رضا شاہ کی پاکستانی کمیونٹی کی مختلف تنظیموں اور نمائندہ شخصیات سے ملاقاتوں کے علاوہ عمرہ کی ادائیگی بھی متوقع ہے۔
کمیونٹی حلقوں کے مطابق سید قمر رضا شاہ کا دورۂ سعودی عرب اوورسیز پاکستانی فاؤنڈیشن اور سعودی عرب میں مقیم پاکستانی کمیونٹی کے درمیان رابطوں کو مزید مؤثر اور مضبوط بنانے کے حوالے سے اہم قرار دیا جا رہا ہے۔
پاکستانی کمیونٹی نے سید قمر رضا شاہ کی سعودی عرب آمد کا خیرمقدم کرتے ہوئے امید ظاہر کی ہے کہ ان کی ملاقاتوں کے ذریعے اوورسیز پاکستانیوں کو درپیش مسائل، مشکلات اور کمیونٹی کی اہم تجاویز متعلقہ فورمز تک مؤثر انداز میں پہنچانے میں مدد ملے گی۔
