جدہ، سعودی عرب: پاکستان کے قونصل خانے جدہ نے پاکستان انویسٹرز فورم کے تعاون سے ایک مقامی سپر مارکیٹ میں ایک روزہ "پاکستانی مینگو فیسٹیول” کا کامیاب انعقاد کیا، جس میں پاکستان کے اعلیٰ معیار کے آموں اور آم سے تیار کردہ مختلف غذائی مصنوعات کی شاندار نمائش کی گئی۔ فیسٹیول کا افتتاح قونصل جنرل پاکستان سید مصطفیٰ ربانی نے جدہ چیمبر آف کامرس کے نائب چیئرمین شیخ عماد العبود اور ممتاز سعودی تاجروں کے ہمراہ کیا۔
نمائش میں پاکستان کے مختلف علاقوں سے لائے گئے اعلیٰ معیار کے آموں کے ساتھ آم سے تیار کردہ بسکٹ، پیسٹری، کیک اور دیگر مصنوعات پیش کی گئیں، جنہیں سعودی شہریوں، پاکستانی کمیونٹی اور مختلف ممالک سے تعلق رکھنے والے مہمانوں نے بے حد سراہا۔ شرکاء نے پاکستانی آموں کے منفرد ذائقے، خوشبو اور اعلیٰ معیار کو دنیا کے بہترین آموں میں شمار کیا۔
اس موقع پر قونصل جنرل سید مصطفیٰ ربانی نے کہا کہ پاکستانی زرعی و غذائی مصنوعات کو عالمی سطح پر متعارف کرانے اور سعودی مارکیٹ میں ان کی رسائی بڑھانے کے لیے قونصل خانہ آئندہ بھی اس نوعیت کی سرگرمیوں کا انعقاد جاری رکھے گا۔ انہوں نے کہا کہ پاکستانی آموں کی طرح پاکستان کے کینو بھی سعودی عرب میں بے حد مقبول ہیں، اور آئندہ سیزن میں کینو فیسٹیول کے انعقاد کے ذریعے دونوں برادر ممالک کے درمیان تجارتی تعلقات کو مزید فروغ دیا جائے گا۔
انہوں نے پاکستان انویسٹرز فورم کے صدر چوہدری شفقت محمود کا خصوصی شکریہ ادا کرتے ہوئے کہا کہ ان کے تعاون اور کاوشوں سے یہ کامیاب نمائش ممکن ہوئی۔
پاکستان انویسٹرز فورم کے صدر چوہدری شفقت محمود نے کہا کہ فورم کا مقصد پاکستان کی معیاری زرعی و غذائی مصنوعات کو سعودی منڈی میں متعارف کرانا، برآمدات میں اضافہ کرنا اور دونوں ممالک کے درمیان تجارت و سرمایہ کاری کے نئے مواقع پیدا کرنا ہے۔ انہوں نے کہا کہ مستقبل میں بھی اس نوعیت کی سرگرمیاں باقاعدگی سے جاری رکھی جائیں گی۔
تقریب میں قونصل خانہ جدہ کی کمرشل قونصل سعدیہ خان اور سفارت خانہ پاکستان ریاض کی کمرشل قونصل ڈاکٹر زریں نے بھی شرکت کی۔ انہوں نے سعودی تاجروں اور مہمانوں کو پاکستان کی زرعی پیداوار، برآمدی صلاحیت اور اعلیٰ معیار کے بارے میں تفصیلی آگاہی فراہم کی۔
تقریب میں شریک کمیونٹی رہنماؤں نے اس اقدام کو خوش آئند قرار دیتے ہوئے کہا کہ ایسی نمائشیں پاکستان کا مثبت تشخص اجاگر کرنے کے ساتھ ساتھ پاکستانی مصنوعات کے لیے نئی تجارتی راہیں ہموار کرنے میں اہم کردار ادا کرتی ہیں۔
سعودی تاجروں نے بھی پاکستانی آموں کے ذائقے، مٹھاس اور خوشبو کو بے مثال قرار دیتے ہوئے کہا کہ اس نوعیت کے ایونٹس سعودی عرب اور پاکستان کے درمیان تجارتی اور ثقافتی تعلقات کو مزید مضبوط بنانے میں اہم کردار ادا کریں گے۔
واضح رہے کہ اس سے قبل بھی پاکستان کے سفارتی مشنز اور پاکستان انویسٹرز فورم کے اشتراک سے ریاض اور دمام میں کامیاب مینگو نمائشوں کا انعقاد کیا جا چکا ہے، جنہیں مقامی سطح پر بھرپور پذیرائی حاصل ہوئی۔
