دمام: مورخہ 7 جولائی 2026 بروز منگل، پاکستان ایمبیسی سعودی عرب کے زیر اہتمام ڈینیوب ہائپر مارکیٹ، دمام میں پاکستانی آموں کی تشہیر کے لیے شاندار مینگو فیسٹیول کا انعقاد کیا گیا، جس میں سفارتی، تجارتی، سماجی، تعلیمی اور میڈیا حلقوں سے تعلق رکھنے والی ممتاز شخصیات، سعودی شہریوں اور مختلف ممالک سے تعلق رکھنے والے افراد نے بڑی تعداد میں شرکت کی۔
تقریب کا اہتمام سفارت خانہ پاکستان کی وزیر برائے تجارت و سرمایہ کاری ڈاکٹر شگفتہ زرین کی جانب سے کیا گیا، جبکہ ٹریڈ ڈویلپمنٹ آفیسر منیر حسن نے انتظامی امور انجام دیے۔ افتتاحی تقریب میں ربن کاٹا گیا اور پاکستانی چونسہ آموں سے تیار کردہ خصوصی کیک کاٹا گیا، جبکہ شرکاء کی تواضع مینگو ٹارٹس، کپ کیکس، کریم پفس اور آم سے تیار کردہ دیگر لذیذ مصنوعات سے کی گئی۔
تقریب کے مہمانِ خصوصی صدر TAFGA گروپ سردار الیاس خان تھے۔ اس موقع پر ڈینیوب ہائپر مارکیٹ کے نمائندگان عبدالرحمن شربینی اور ابراہیم مختار بن جمعہ، ڈاکٹر خالد الدوسری، سیدہ نمیرہ محسن شیرازی، سید ذوالنون بخاری، اریج فاروق، ڈاکٹر علی، منیر منشا، زنیرہ بخاری، عائشہ طارق اور فاطمہ بخاری، شہناز اختر سمیت مختلف شعبہ ہائے زندگی سے تعلق رکھنے والی شخصیات بھی موجود تھیں۔
پاکستانی چونسہ آموں کے منفرد ذائقے، خوشبو اور اعلیٰ معیار نے شرکاء اور خریداروں کو بے حد متاثر کیا، جس کے نتیجے میں میلے کے دوران آموں کی فروخت میں نمایاں اضافہ دیکھنے میں آیا۔ متعدد سعودی شہریوں نے پاکستانی آم بڑی مقدار میں خریدے، جبکہ بین الاقوامی سوشل میڈیا انفلوئنسرز اور وی لاگرز نے تقریب کی بھرپور کوریج کر کے پاکستانی آموں کی شہرت کو عالمی سطح پر اجاگر کیا۔
اس موقع پر وزیر ڈاکٹر شگفتہ زرین نے کہا کہ پاکستان کے آم اور خصوصا چونسہ آم دنیا کے بہترین آموں میں شمار ہوتے ہیں اور سفارت خانہ پاکستان سعودی عرب میں پاکستانی زرعی مصنوعات کے فروغ اور برآمدات میں اضافے کے لیے مسلسل کوشاں ہے۔ انہوں نے کہا کہ ایسے تجارتی و ثقافتی پروگرام دونوں برادر ممالک کے درمیان اقتصادی روابط کو مزید مستحکم بنانے میں اہم کردار ادا کرتے ہیں۔
میلے میں شریک متعدد سعودی شہریوں اور دیگر مہمانوں نے پاکستانی چونسہ آموں کی خوشبو اور ذائقے کو بے حد سراہتے ہوئے اس خواہش کا اظہار کیا کہ پاکستان کے دیگر خوشبودار اور اعلیٰ معیار کے پھل، خصوصاً آڑو، خوبانی، امرود، کینو، لیچی اور دیگر موسمی پھل بھی سعودی مارکیٹ میں متعارف کرائے جائیں تاکہ وہ بھی ان کے منفرد ذائقے اور معیار سے لطف اندوز ہو سکیں۔
منتظمین نے امید ظاہر کی کہ مینگو فیسٹیول کی کامیابی سے سعودی مارکیٹ میں پاکستانی آموں اور دیگر زرعی مصنوعات کی طلب میں مزید اضافہ ہوگا، جس سے پاکستان اور سعودی عرب کے درمیان دوطرفہ تجارتی تعلقات مزید فروغ پائیں گ
