ریاض: پاکستان مسلم لیگ (ن) سعودی عرب کے زیرِ اہتمام سعودی عرب کے قومی دن کے موقع پر ریاض میں ایک پروقار تقریب کا انعقاد کیا گیا، جس میں پاکستانی کمیونٹی کی نمایاں شخصیات، مسلم لیگ (ن) کے رہنماؤں اور کارکنوں نے بھرپور شرکت کی۔
تقریب کی صدارت پاکستان مسلم لیگ (ن) سعودی عرب کے سینئر نائب صدر خالد اکرم رانا نے کی، جبکہ زاہد سندھو اور زاہد بٹ نے خصوصی شرکت کی۔
تقریب میں چوہدری عبدالمجید، رانا اشرف، پاکستان پیپلز پارٹی کے جنرل سیکرٹری خالد رانا، چوہدری خادم حسین بجاڑ، ارشد بھٹی، شہزاد احمد، چوہدری عثمان گجر، رضا افتخار، خواجہ شفیق، زرار بلوچ اور میاں عمران سمیت دیگر اہم شخصیات بھی موجود تھیں۔
تقریب کے دوران سعودی عرب کے قومی دن کی مناسبت سے کیک کاٹا گیا۔ شرکاء نے مملکت سعودی عرب کی ترقی، خوشحالی، سلامتی اور استحکام کے لیے خصوصی دعائیں بھی کیں۔
اس موقع پر مقررین اور شرکاء نے پاکستان اور سعودی عرب کے درمیان دیرینہ برادرانہ اور دوستانہ تعلقات کو اجاگر کرتے ہوئے سعودی قیادت اور عوام کو قومی دن کی مبارکباد پیش کی اور مملکت کی مزید ترقی و خوشحالی کے لیے نیک خواہشات کا اظہار کیا۔
شرکاء نے اس عزم کا اظہار بھی کیا کہ پاکستان اور سعودی عرب کے درمیان تاریخی، برادرانہ اور باہمی تعلقات کو مزید مضبوط بنانے کے لیے اپنی کوششیں جاری رکھی جائیں گی۔
